Policia e Kosovës ka njoftuar për ekstradimin e dy personave nga Italia, të cilët kërkoheshin nga institucionet e drejtësisë së Kosovës.
Në njoftimin e Policisë, bëhet e ditur se i kërkuari A.B., kërkohej për veprën ‘’vjedhje e rëndë’’, ndërsa Xh.K., kërkohej për ‘’vrasje në tentativë dhe armëmbajtje pa leje’’, përcjell Express.
Njoftimi:
Ekstradohet nga Italia për në Kosovë, dy të kërkuar me letër rreshtim ndërkombëtar, pasi që të njëjtit i ishin shmangur drejtësisë
Prishtinë, më 14 mars 2026
Policia e Kosovës, përkatësisht Drejtoria për Bashkëpunim Ndërkombëtar Policor, në koordinim dhe bashkëpunim me njësitet tjera relevante të Policisë së Kosovës dhe institucionet e drejtësisë, me datat 12 dhe 13 mars 2026, kanë realizuar me sukses ekstradimin nga Italia për në Kosovë, të dy të kërkuarve përmes INTERPOL-it me letër rreshtim ndërkombëtar lëshuar nga institucionet e drejtësisë së Kosovës dhe që të njëjtit ishin arrestuar nga autoritete italiane.
Me datë 12.03.2026, është realizuar ekstradimi i të kërkuarit A.B., pasi që nga institucionet e drejtësisë së Kosovës, kërkohej për veprën penale “Vjedhje e rëndë”.
Ndërsa me datën 13.03.2026, është ekstraduar i kërkuari Xh.K., pasi që i njëjti nga institucionet e drejtësisë së Kosovës, kërkohej për veprat penale “Vrasje në tentativë dhe armëmbajtje pa leje”
Të dy ekstradimet u realizuan bazuar në ligjet në fuqi dhe bashkëpunimit të ngushtë mes institucioneve të Republikës së Kosovës dhe atyre Italiane.
Pas ekstradimit, të dyshuarit u dorëzuan njësiteve përkatëse të policisë rajoni i Prizrenit përkatësisht Mitrovicës.
