John Obi Mikel, ish-mesfushori i Chelsea dhe Nigerisë, ka shkaktuar polemika të mëdha pasi akuzoi Arsenalin se po mashtrojnë për të fituar titullin në Premier League.
Në një intervistë për talkSPORT, Mikel kritikoi stilin e lojës së ekipit të trajnerit Mikel Arteta, duke thënë se skuadra londineze mbështetet pothuajse vetëm te goditjet nga këndi dhe situatat standarde për të fituar ndeshjet.
Një ekip me lojtarë cilësorë si Bukayo Saka, Gabriel Martinelli dhe Martin Odegaard, sipas tij është e pakuptueshme të mos shfrytëzojë kreativitetin në lojë të hapur.
Mikel shtoi se Arsenali ka shpenzuar afro një miliard euro për ndërtimin e skuadrës, por sipas tij mënyra se si po fiton ndeshjet është e shëmtuar dhe shumë e varur nga skemat në goditjet e këndit. Tutje deklaroi se nuk do ta konsideronte Arsenalin kampion të vërtetë nëse e fiton ligën në këtë mënyrë.
Aktualisht, Arsenali kryeson tabelën e Premier League dhe është pranë titullit të parë kampion pas më shumë se dy dekadash.
