Në “luftën politike” mes kryeministrit në detyrë, Albin Kurtit dhe presidentes, Vjosa Osmani, një heshtje “shurdhuese” e Donika Gërvallës po vërehet qartazi.
Ani pse kryetare e “GUXO”, siç duket Donika Gërvalla nuk po guxon të flas, e as t’i jap mbështetje ish-kryetares dhe ish-bashkëpartiakes, Vjosa Osmani, transmeton lajmi.net.
Reagimi i vetëm i Gërvallës në këtë temë është shpërndarja e komunikatës së partisë, ku flitej për dorëheqjen e deputetit Haxhi Avdyli dhe në fund të komunikatës thuhej që “Guxo” nuk është pjesë e linçimeve ndaj Osmanit.
“Në fund, për shkak të disa pretendimeve për motivet e dorëheqjes, e ndjejmë obligim të konfirmojmë se askush nga Partia Guxo nuk është përfshirë dhe nuk përfshihet as në debate të ulëta dhe as në linçime publike të askujt e aq më pak të Presidentes së Republikës. Partia Guxo angazhohet me ngulm për respektimin e rendit, ligjit dhe kushtetueshmërisë në të gjitha zhvillimet në vend duke përfshirë edhe zhvillimet e fundit.”, thuhej në komunikatë.
20 MAJ – 2016
Kjo datë shënon ndoshta fillimin e shoqërisë politike mes Donika Gërvallës dhe Vjosa Osmanit. Me këtë datë, Donika Gërvalla ishte tërhequr zvarrë nga mbledhja e LDK-së dhe Vjosa Osmani ishte e vetmja që në shenjë proteste kishte lëshuar mbledhjen, e i kishte dalë përkrah Gërvallës.
Gërvalla atë kohë ishte kryetare e degës së LDK-së në Gjermani.
5 nëntor 2020
Vjosa Osmani në këtë datë e themeloi Listën Guxo pas largimit nga LDK. Ajo e themeloi këtë listë në bashkëpunim me Donika Gërvallën dhe Faton Pecin, dy të larguar nga LDK.
Pasi u bë Presidente e vendit, kjo listë i mbeti në udhëheqje Donika Gërvallës dhe Faton Pecit, të cilët me 14 shkurt 2022 e regjistruan si parti politike.
Por derisa Osmani po drejtonte presidencën e Gërvalla Ministrinë e Punëve të Jashtme, kriza kishte filluar veçse mes tyre.
Osmani dhe Gërvalla prej kohësh as nuk takoheshin dhe as nuk diskutonin me njëra-tjetrën.
E gjitha çfarë pati mbetur ishin “dissat” që bënin me këngët e Dafina Zeqirit. Pas kësaj, Gërvalla në fakt ishte pozicionuar më shumë krah Albin Kurtit se sa përkrah Vjosa Osmanit (mikes së vjetër). Ngjashëm veproi edhe Faton Peci, që drejtonte ministrinë e Bujqësisë e më pas falë Albin Kurtit iu mundësua ta drejtonte Komunën e Mitrovicës.
Anipse Osmani e vizitoi menjëherë pas zgjedhjeve, Faton Peci nuk e tha tani asnjë fjalë për zhvillimet e fundit.
5 mars 2025
Ky ishte afati i fundit kur Kosova do të duhej të zgjidhte presidentin apo presidenten e re të vendit.
Përkundër që presidentja aktuale, Vjosa Osmani shprehu gatishmërinë që ta marrte edhe një mandat, ajo nuk mori përkrahjen nga ish-partnerët.
Lëvizja Vetëvendosje nuk ishte e gatshme që ta propozonte dhe Guxo e Gërvallës s’u deklarua fare mbi këtë temë, duke qëndruar njëzëri në koordinim me Kurtin dhe Vetëvendosjen.
Madje i vetmi që doli kundër Kurtit në këtë rast nga Guxo është Haxhi Avdyli, i cili dha dorëheqje nga kjo parti, e mbrëmë hëngri iftar me Osmanin e bashkëshortin e saj.
Dyshja Osmani-Gërvalla gjatë këtyre 5 viteve kanë pasur përplasje në distancë, por mos bërja zë për çështjen e zgjedhjes së Presidentit dhe linçimet e VV-së kundër presidentes aktuale duke se janë një konfirmim se miqësia mes tyre kanë përfunduar dhe tashmë janë “rivale”./Lajmi.net/
