Telashe të reja për ish-mesfushorin anglez Joey Barton.
43-vjeçari është arrestuar nga policia pas një sherri të ndodhur pranë një klubi golfi në Liverpool.
Sipas raportimeve të mediave britanike, incidenti ndodhi të dielën rreth orës 21:00 pranë Huyton and Prescot Golf Club, ku shërbimet e emergjencës u thirrën pasi një person u sulmua gjatë një përleshjeje, përcjell “Gazeta Express”.
Viktima pësoi lëndime në fytyrë dhe në brinjë dhe u dërgua në spital për trajtim dhe kontroll mjekësor.
Policia e Merseyside konfirmoi se dy persona, një 43-vjeçar dhe një 50-vjeçar, janë arrestuar nën dyshimin për “plagosje të rëndë me dashje”, një akuzë serioze në ligjin britanik.
Të dy janë marrë në pyetje ndërsa hetimet për ngjarjen vazhdojnë.
Barton, i njohur për karakterin e tij shpesh kontrovers gjatë karrierës, ka luajtur më parë për klube si Manchester City, Newcastle United, Queens Park Rangers dhe Burnley FC, ndërsa pas përfundimit të karrierës u bë trajner dhe komentator. /Gazeta Express
