Presidenti i Federatës së Futbollit të Iranit, Mehdi Taj, e ka dhënë një deklaratë të fortë lidhur me pjesëmarrjen e kombëtares iraniane në Kupën e Botës 2026, që do të zhvillohet këtë verë në Shtetet e Bashkuara të Amerikës, Meksikë dhe Kanada.
Në një intervistë për portalin sportiv iranian “Varzesh3”, Taj u shpreh se situata e krijuar pas sulmeve ushtarake ndaj vendit të tij e ka hedhur një hije të rëndë mbi perspektivën e Botërorit, përcjell “Gazeta Express”.
“Në dritën e ngjarjeve të sotme dhe të sulmeve të kryera nga Shtetet e Bashkuara, është e vështirë të jesh optimist për mundësinë për të qenë prezent në Kupën e Botës.”
Ai theksoi se pas këtyre sulmeve, “nuk mund të presim me shpresë për Botërorin”, duke nënvizuar se situata politike dhe ushtarake ka bërë që perspektiva e pjesëmarrjes të jetë shumë e pasigurt.
Federata iraniane do ta shqyrtojë me kujdes këtë çështje dhe, siç tha Taj, vendimi final do të merret nga organet më të larta sportive të vendit.
Iranit i kanë ardhur në vitet e fundit një sërë sfidash jo vetëm sportive, por edhe politike — përfshirë edhe vështirësitë me vizat drejt SHBA-së dhe tensionet e krijuara nga konfliktet më të gjera rajonale — çka e bën rrugëtimin drejt Botërorit edhe më të komplikuar.
Nëse situata nuk qetësohet, kjo mund ta vërë në rrezik jo vetëm pjesëmarrjen e Iranit, por edhe ecurinë e tij në garë, ku kishte përfunduar në Grupin G me Belgjikën, Egjiptin dhe Zelandën e Re. /Gazeta Express
