Ali Khamenei, 86 vjeç, ka udhëhequr Iranin që prej vitit 1989, duke mbajtur postin më të lartë politik dhe fetar në Republikën Islamike. Si Udhëheqës Suprem, ai ka autoritetin përfundimtar mbi të gjitha institucionet shtetërore – qeverinë, parlamentin, gjyqësorin dhe forcat e armatosura – si dhe ndikim vendimtar mbi politikat strategjike të vendit.
Sot, pas 36 vitesh në pushtet, ai përballet me krizën më të thellë të sundimit të tij, në një moment kur tensionet rajonale dhe presioni ndërkombëtar ndaj Teheranit kanë arritur kulmin.
Një zyrtar izraelit deklaroi se sulmet e së shtunës kishin në shënjestër drejtpërdrejt Khamenein. Megjithatë, sipas një burimi me njohuri për çështjen që foli për Reuters, udhëheqësi suprem nuk ndodhej në Teheran në momentin e goditjes dhe ishte transferuar në një vend të sigurt.
Gjatë pothuajse katër dekadave në krye të Iranit, Khamenei ka konsoliduar një sistem pushteti të centralizuar dhe ka ndërtuar një rrjet aleancash rajonale për ta shndërruar vendin në një fuqi dominuese në Lindjen e Mesme. Strategjia e tij ka synuar rivalizimin me shtetet sunite të Gjirit, ndërsa programi bërthamor i Iranit është kthyer në burim të vazhdueshëm përplasjeje me Perëndimin.
Irani ka mbajtur një qëndrim të ashpër ndaj Shteteve të Bashkuara dhe Izraelit, duke i konsideruar si kundërshtarë strategjikë. Brenda vendit, autoritetet kanë shtypur me forcë valë të përsëritura protestash, ndërsa ekonomia ka vuajtur nën peshën e sanksioneve ndërkombëtare.
Sulmet e fundit vijnë në një periudhë të mbushur me sfida të shumta për regjimin iranian. Në qershorin e kaluar, goditje ajrore vranë disa nga bashkëpunëtorët më të afërt të Khameneit dhe komandantë të lartë të Gardës Revolucionare. Sipas raportimeve, sulmet e qershorit 2025 nga Izraeli dhe SHBA-të dëmtuan rëndë objekte kyçe bërthamore dhe raketore.
Në janar, protesta masive shpërthyen në disa qytete të vendit, të nxitura nga pakënaqësia ekonomike dhe sociale. Shtypja e tyre, sipas burimeve të ndryshme, pati një bilanc të rëndë viktimash.
Ndërkohë, që prej sulmit të 7 tetorit 2023 nga Hamasi – grup i mbështetur nga Teherani – ndaj Izraelit, ndikimi rajonal i Iranit është vënë nën presion të shtuar. Zhvillimet e fundit duket se e kanë futur udhëheqësin suprem përballë një sfide vendimtare për të ardhmen e regjimit dhe të rolit të Iranit në rajon./Lajmi.net/
