Përfaqësuesi i Tregtisë i SHBA-së, Jamieson Greer, deklaroi se marrëveshjet tregtare të Shteteve të Bashkuara me Bashkimi Evropian, Kinën dhe partnerë të tjerë do të mbeten në fuqi, pavarësisht vendimit të fundit të Gjykata Supreme e SHBA që rrëzoi një pjesë të tarifave të vendosura nga presidenti Donald Trump.
“Ne po angazhohemi aktivisht me partnerët tanë tregtarë. Duam që ata të kuptojnë se këto janë marrëveshje të mira dhe presim që të respektohen. Jemi të bindur se edhe partnerët tanë do t’i zbatojnë”, tha Greer në një intervistë për CBS.
Më herët, Gjykata Supreme shpalli të pavlefshme të ashtuquajturat tarifa “hakmarrëse”, duke argumentuar se vendosja e tyre kërkon miratimin e Kongresit, edhe pse ligji i vitit 1977 për Kompetencat Ekonomike Emergjente Ndërkombëtare (IEEPA) i jep presidentit kompetenca të gjera në raste emergjente.
Pas vendimit, Trump nënshkroi një urdhër të ri ekzekutiv që vendos një tarifë globale prej 10%, e cila më pas u rrit në 15%. Masa do të hyjë në fuqi më 24 shkurt dhe do të zgjasë 150 ditë, me disa përjashtime.
Në një intervistë tjetër për ABC, Greer theksoi se takimi i planifikuar në prill mes Trump dhe presidentit kinez Xi Jinping nuk synon përplasje tregtare, por ruajtjen e stabilitetit dhe zbatimin e marrëveshjeve ekzistuese.
“Qëllimi është të sigurohemi që palët të mbajnë angazhimet e tyre, përfshirë blerjen e produkteve amerikane, si produkte bujqësore dhe avionë Boeing, si dhe furnizimin me metale të rralla që na nevojiten”, u shpreh ai.
Greer pranoi se ligji IEEPA i ka dhënë Shtëpisë së Bardhë më shumë fleksibilitet krahasuar me mekanizmat e tjerë ligjorë, por theksoi se administrata do të vazhdojë të veprojë brenda kuadrit ligjor për të mbrojtur interesat tregtare të SHBA-së.
