Borussia Dortmundi raportohet se po shqyrton mundësinë për ta rikthyer Jadon Sancho për herë të tretë, ndërsa kontrata e tij me Manchester United po shkon drejt fundit.
Sancho, 25 vjeç, aktualisht i huazuar tek Aston Villa, pritet të bëhet lojtar i lirë pasi kontrata e tij me Unitedin skadon në fund të sezonit.
Kuptohet se United ka një opsion për ta zgjatur kontratën e anësorit edhe për një vit, por ka shumë pak gjasa që ta aktivizojë atë.
Sipas “TEAMtalk”, gjigantët gjermanë të Dortmundit shpresojnë ta rikthejnë anësorin sapo ai të bëhet lojtar i lirë.
Një rikthim në “Signal Iduna Park” gjatë verës do të shënonte periudhën e tij të tretë me klubin, pasi ai u transferua nga Manchester City në vitin 2017 dhe më pas u rikthye sërish në formë huazimi nga Manchester United në vitin 2024.
Dortmundi e shiti Sanchon tek Unitedi për 85 milionë euro në vitin 2021, pasi paraprakisht e kishte blerë nga City për 20 milionë euro.
Sezonin e kaluar, Sancho e kaloi në huazim te Chelsea, i cili kishte një mundësi blerje, por që nuk e aktivizoi./GazetaExpress/
