Zyra për Mbrojtje dhe Ndihmë të Viktimave ka bërë të ditur se gjatë një jave pune, mbrojtësit e viktimave në nivel të Kosovës kanë trajtuar gjithsej 59 raste të reja, shumica prej të cilave lidhen me dhunën në familje.
Sipas komunikatës, nga këto raste 48 janë të dhunës në familje, 6 raste të tentim-vrasjes, 2 raste të ngacmimit seksual, 1 rast i vrasjes, si dhe 2 raste të shkeljes së Urdhrit Mbrojtës (UM).
“Në kuadër të këtyre rasteve, mbrojtësit e viktimave kanë ndërmarrë veprime të shumta ligjore dhe përfaqësuese në mbrojtje të të drejtave të viktimave,” thuhet në njoftim.
Gjatë kësaj periudhe, janë parashtruar 7 kërkesa për Urdhër Mbrojtjeje (KUM) në gjykatë, 25 kërkesa për Urdhër Mbrojtjeje Emergjente (KUME), si dhe 3 kërkesa për urdhër mbrojtës të përkohshëm emergjent. Po ashtu, janë paraqitur 2 kërkesa për ndërprerje të UM-së dhe 2 kërkesa për ndryshim të UM-së.
Në komunikatë bëhet e ditur se gjykatat kanë aprovuar 30 aktvendime, ndërsa 2 aktvendime janë tërhequr. Po ashtu, është regjistruar 1 kërkesë për kompensim nga Fondi i Viktimave dhe 1 përpilim i parashtresave të ndryshme.
Gjatë javës janë mbajtur gjithsej 86 seanca gjyqësore dhe 12 seanca në prokurori, ndërkohë që mbrojtësit e viktimave kanë ofruar 76 këshilla juridike për palët e përfshira.
“Si rezultat i përfaqësimit ligjor, janë nxjerrë 12 aktgjykime dënuese dhe 2 aktgjykime refuzuese,” theksohet më tej në komunikatë.
Po ashtu, janë realizuar 2 përfaqësime të rasteve në polici, 1 referim i rastit në polici, 6 referime të rasteve në Qendrën për Punë Sociale (QPS), si dhe është dhënë 1 deklaratë mbi dëmin.
