Ismet Kryeziu nga KDI ka kërkuar përsëritjen e zgjedhjeve në këtë komunë, dhe sipas tij është cenuar integriteti i procesit të fundit zgjedhor.
Në një reagim në Facebook, Kryeziu thotë se zbulimi i parregullsive dhe manipulimeve ka prekur mbi 60 mijë vota të qytetarëve, gjë që, sipas tij, e bën procesin të papranueshëm për t’u certifikuar.
“Si qytetar dhe votues i Komunës së Prizrenit, shpreh shqetësimin tim, por edhe të shumë bashkëqytetarëve të mi, lidhur me cenimin e integritetit të procesit të fundit zgjedhor”, ka deklaruar Kryeziu.
Ai thekson se shkarkimi i anëtarëve të Komisionit Komunal të Zgjedhjeve, arrestimi dhe ngritja e aktakuzave ndaj mbi 100 komisionerëve zgjedhorë, si dhe korrigjimi i votave për kandidatë të caktuar, janë dëshmi se procesi ka qenë i komprometuar rëndë.
“Këto zhvillime dëshmojnë se ky proces ka qenë thellësisht i kontaminuar”, ka theksuar ai.
Sipas Kryeziut, edhe pse janë ndërmarrë hapa për anulimin e votave të manipuluara, kjo nuk mjafton për të rikthyer besimin e qytetarëve.
“Korrigjimet teknike asnjëherë nuk janë të mjaftueshme për të rikthyer besimin publik dhe për të garantuar se rezultati përfundimtar pasqyron realisht vullnetin e lirë të qytetarëve”, është shprehur ai.
Ai shton se, pavarësisht se institucionet e drejtësisë ende nuk kanë dhënë vendime përfundimtare për përgjegjësinë individuale të kandidatëve, besimi në integritetin e përfaqësuesve të zgjedhur është dëmtuar rëndë.
“Në një demokraci funksionale, legjitimiteti i mandatit buron jo vetëm nga ligjshmëria formale, por edhe nga besueshmëria e procesit që e prodhon atë”, ka deklaruar Kryeziu.
Duke folur për pasojat politike, ai thekson se qytetarët e Prizrenit nuk duhet të penalizohen për parregullsi që nuk i kanë shkaktuar vetë, as të mbesin pa përfaqësim në Kuvend.
“Mendoj që votuesit e Prizrenit nuk do të duhej të penalizohen për parregullsitë që nuk i kanë shkaktuar vetë”, ka shtuar ai.
Kryeziu ka bërë thirrje për përsëritjen e zgjedhjeve në Komunën e Prizrenit, duke e cilësuar këtë si zgjidhjen e vetme të drejtë dhe proporcionale.
“Kërkoj përsëritjen e zgjedhjeve në Komunën e Prizrenit, si mjeti i vetëm për të rivendosur besimin në procesin zgjedhor dhe në përfaqësimin politik të qytetarëve”, ka shtuar ai.
