Juventusi po shqyrton mundësinë e një goditjeje të madhe në merkato.
Sipas Foot Mercato, klubi bardhezi ka vendosur në shënjestër mesfushorin italian Sandro Tonali, i cili aktualisht aktivizohet te Newcastle United, shkruan IndeksOnline.
Operacioni nuk është i thjeshtë, pasi Newcastle e vlerëson Tonalin rreth 80-85 milionë euro dhe nuk ka ndërmend të heqë dorë lehtë nga një prej lojtarëve kryesorë të mesfushës.
Për këtë arsye, Juventusi po analizon formula alternative, përfshirë huazimin me të drejtë ose detyrim blerjeje, të lidhur edhe me kualifikimin në Champions League.
Në këtë kontekst, në tavolinë ka dalë emri i Jonathan David. Sulmuesi kanadez, i transferuar te Juventusi në verën e vitit 2025 pas largimit nga Lille, nuk ka arritur ende të shfaqë vazhdimësi në paraqitje dhe mund të përdoret si pjesë e një shkëmbimi të mundshëm për të lehtësuar marrëveshjen me klubin anglez.
Tonali shihet nga drejtuesit bardhezinj si një përforcim kyç për mesfushën, një lojtar me personalitet dhe eksperiencë që mund t’i japë ekuilibër dhe cilësi skuadrës. Nga ana tjetër, përfshirja e Jonathan David në negociata mund ta bëjë ofertën më tërheqëse për Newcastle.
Për momentin, gjithçka mbetet në fazën e spekulimeve, pa një marrëveshje konkrete mes palëve. Megjithatë, Juventusi duket i vendosur të provojë çdo rrugë për të sjellë Tonalin në Torino, qoftë në afatin e janarit apo gjatë merkatos së verës./IndeksOnline/
