Faqja më e madhe në botë për gjurmimin e fluturimeve, Flightradar24, ka shtuar edhe këtë vit një element argëtues për përdoruesit e saj, duke “gjurmuar” në mënyrë simbolike slitën e Babagjyshit gjatë natës së Krishtlindjes.
Si pjesë e një tradite tashmë të njohur, Flightradar24 e paraqet Babagjyshin si një “fluturim special”, duke simuluar lëvizjen e slitës së tij nëpër botë, ndërsa shpërndan dhurata. Kjo iniciativë ka karakter rekreativ dhe argëtues, duke synuar të sjellë buzëqeshje, veçanërisht tek fëmijët dhe familjet.
Në hartën interaktive, përdoruesit mund të shohin itinerarin imagjinar të Babagjyshit, shpejtësinë dhe ndalesat e tij, njësoj si çdo avion tjetër në platformë.
Ky “gjurmim” është bërë tashmë një nga momentet më të pëlqyera të fundvitit në rrjetet sociale, duke treguar se edhe platformat teknologjike mund të sjellin magjinë e festave në mënyrë kreative.
