Një turmë gjithnjë e në rritje në Hong Kong po bën homazhe dhe po vendos lule për 128 personat e vrarë në një nga zjarret më vdekjeprurëse të qytetit, duke shënuar fillimin e tre ditëve zie të shpallura nga autoritetet.
Shumë njerëz u mblodhën në një park pranë rrënojave të djegura të Wang Fuk Court, kompleksit rezidencial që u dogj për më shumë se 40 orë, për të vendosur lule të bardha dhe të verdha dhe mesazhe përkujtimore të shkruara me dorë, shkruan ANSA.
Udhëheqësit qeveritarë, raporton Guardian, së bashku me dhjetëra nëpunës të lartë civilë, qëndruan në heshtje për tre minuta të shtunën në mëngjes jashtë ndërtesës qeveritare, ku flamujt kinezë dhe të Hong Kongut ishin në gjysmë shtizë.
