Ardian Gjini, kryetari i rizgjedhur i Gjakovës edhe për një mandat të dytë, ka shprehur mirënjohje për kundër kandidatin e tij në balotazhin e të dielës, Ardian Golajn.
Në një deklarim në “ATV”, Gjini u shpreh se Golaj i LVV-së e ka telefonuar dhe uruar për fitoren në garën e zgjedhjeve lokale, shkruan IndeksOnline.
“Më ka thirrë në telefon Ardian Golaj dhe më ka uru fitoren. Ishte shumë korrekt. E falënderoj për një gjë të tillë. E kisha bë edhe unë një gjë të tillë, të drejtën po iu tregoj. Korrekte ka qenë telefonata e tij. Lloj tjetër të komunikimit jo – nuk kemi pasë” u shpreh Gjini.
Gjini mori 56.03 për qind të votave në balotazh, më saktësisht 17 mijë e 24 vota.
Nga ana tjetër, Golaj mori 43.97%, ose 13 mijë e 362 vota.
Nga 121 mijë e 386 banorë të Gjakovës me të drejt vote në raundin e dytë të zgjedhjeve, vetëm 30 mijë e 386 ushtruan këtë të drejt./IndeksOnline/
