Kryeministri i Shqipërisë, Edi Rama, ka reaguar pas fitores së Partisë Socialiste në pesë bashkitë ku u mbajtën zgjedhjet e pjesshme një ditë më parë.
Në një postim në Facebook, Rama ka falënderuar qytetarët për besimin, duke theksuar se fitorja vjen pavarësisht, siç tha ai, dobësisë së opozitës dhe kushteve të motit ditën e votimit.
“5 bashki, 5 fitore dhe 5 arsye më shumë, për t’i falenderuar qytetarët për besimin e tyre, pavarësisht dobësisë ekstreme të opozitës, motit me shi të ditës se djeshme, apo vetë natyrës së zgjedhjeve të pjesshme, të cilat nuk është se e stimulojnë pjesëmarrjen.
Urime kryebashkiakëve të rinj, nga Bruna, gruaja e parë që do të drejtojë bashkinë e Vlorës;
Ervini i dytë i Beratit, i cili me mbi 83% të votave dhe 13 049 vota nga 15 454 të PS në 11 maj për bashkinë Berat, ka arritur një rezultat mbresëlënës;
Florenci në Cërrik, Gramozi në Tepelenë dhe Altini në Mat, që të tre me rezultate kuptimplota, të cilat janë një themel i fortë i punës që do të pasojë në shërbim të atyre komuniteteve”, shkroi kryeminstri shqiptar.
