Ka përfunduar me sukses aksioni i kërkim-shpëtimit i zhvilluar sot në fshatin Bresalc të Komunës së Gjilanit, pas raportimeve për një person të zhdukur.
Lajmin e ka konfirmuar për Indeksonline zëdhënësi i Policisë për rajonin e Gjilanit, Ismet Hashani, i cili tha se operacioni është ndërprerë në momentin që policia ka gjetur veturën e kërkuar.
Sipas tij, njësitë policore dhe ekipet e kërkim-shpëtimit kanë qenë në terren që nga orët e hershme të mëngjesit. Vetura është lokalizuar në një zonë malore afër Gjilanit, ndërsa po hetohen shkaqet e pranisë së saj atje.
“Sot, më 08.11.2025, njësitet e Policisë së Kosovës dhe ekipet e kërkim-shpëtimit kanë zhvilluar një aksion nga orët e para të mëngjesit. Kërkimi ka përfunduar sapo është gjetur vetura në një mal afër Gjilanit. Aktualisht po hetohen rrethanat pse ndodhej vetura aty. Për rastin është njoftuar prokurori i shtetit. Nuk raportohet për persona të lënduar,” deklaroi Hashani./IndeksOnline/
