“Jam nën përcjellje të disa personave”, është një pretendim i kandidatit të VV-së për Mitrovicë së Jugut, Faton Peci.
Këtë pretendim e ka thënë disa herë në paraqitjet mediatike. Të njëjtën e përsëriti edhe mbrëmë, transmeton lajmi.net.
“Unë tash kam vërejtur kohëve të fundit, në Mitrovicë se jam nën përcjellje të disa personave, të cilët çdo lëvizje timen e monitorojnë. Disa prej miqve të mi po thonë se janë të njëjtit persona e njëjtë që kanë tentuar të hyjnë dhunshëm dhe me pistoleta në brezë në zyrët e VV-së, janë po të njëjtit persona që Mitrovica prindërit e tyre i njeh si bandita”, tha ai ndër të tjera në ATV mbrëmë.
Në lidhje me këto pretendime të Pecit, lajmi.net ka kontaktuar me Prokurorinë Themelore në Mitrovicë të Jugut.
Në një përgjigje të shkurtër, Prokuroria ka konfirmuar që Policia është duke i trajtuar këto pretendime.
“Njoftoheni se këto pretendime janë duke u trajtuar nga policia”, thuhet në përgjigjen e Prokurorisë Themelore të Mitrovicës së Jugut.
Këto pretendime të Pecit, të pa argumentuara, po bëhen kur kanë mbetur edhe dy ditë deri në balotazh, ku ai për kundërkandidat e ka Arian Tahirin e PDK-së./lajmi.net/
