6 persona në Tiranë, 3 prej tyre vëllezër, kanë kanosur dhe shantazhuar një 29-vjeçar dhe familjarët e tij me pretendimin se i riu u kishte një shumë parash borxh.
Një prej tyre, Ersi Cekani, 26 vjeç është arrestuar, katër janë proceduar penalisht, ndërsa një tjetër u shpall në kërkim.
Policia nisi procedimin penal në gjendje të lirë për shtetasit A. C., 35 vjeç, R. B., 35 vjeç, S. B., 19 vjeç, banues në Librazhd dhe L. F., 32 vjeç, banues në Peshkopi, ndërsa shpalli në kërkim shtetasin A. C., 28 vjeç, vëllai i 26-vjeçarit të arrestuar dhe i 35-vjeçarit të proceduar.
“Nga hetimet dyshohet se këta 6 shtetas, në bashkëpunim me njëri-tjetrin, kanë kanosur dhe shantazhuar nëpërmjet celularit, 29-vjeçarin dhe familjarët e tij, me pretendimin se këta shtetas i kishin borxh një shumë të konsiderueshme parash”, njofton policia.
Uniformat blu po punojnë për kapjen e shtetasit A. C. dhe për dokumentimin e rrethanave të rastit.
Ndaj këtyre shtetasve rëndon vepra penale “Shtrëngimi me anë të kanosjes ose dhunës për dhënien e pasurisë”, kryer në bashkëpunim.
