Katër ngjarje të rënda janë shënuar gjatë ditës së martë në Shqipëri, ku brenda pak orësh janë regjistruar tri vrasje dhe një shpërthim me tritol.
Në Shkodër, rreth mesditës, 38-vjeçari E. B., punonjës në administratën tatimore, mbeti i plagosur pasi mjetit të tij i ishte vendosur lëndë plasëse. Shpërthimi ndodhi në momentin kur ai ndezi veturën. Mbeti i plagosur, ndërsa policia po heton rrethanat dhe motivet e mundshme.
Ndërkohë, në Durrës, 25-vjeçari M. K. vrau me thikë babanë e tij, P. K. Konflikti dyshohet se ka ndodhur pas një debati të çastit, ndërsa autori është vënë në prangat e policisë.
Një tjetër vrasje u regjistrua në Tiranë, në zonën e Komunës së Parisit. 34-vjeçari I. I., që punonte si kamerier, mbeti i vrarë me thikë nga kolegu i tij, F. Sh., i cili ushtronte profesionin e kuzhinierit në të njëjtin lokal. Nga dëshmitë paraprake, dyshohet se ngjarja ndodhi pas një konflikti për çështje pune.
Ngjarja e katërt u shënua në Berat, ku pas një zënke për motive të dobëta, 63-vjeçari K. M., i njohur edhe me emrin K. H., goditi me mjet prerës 42-vjeçarin K. H., i cili humbi jetën si pasojë e plagëve të marra.
