Pas dështimit të Lëvizjes Vetëvendosje për të siguruar votat e nevojshme për krijimin e qeverisë së re, ka pasuar një sërë reagimesh nga figura politike e publike në vend.
Një ndër ta ka qenë edhe këngëtari dhe ish-deputeti Labinot Tahiri, i cili ka reaguar përmes një postimi të gjatë në Facebook.
Tahiri ka shprehur keqardhje për situatën politike në Kosovë, duke kritikuar deputetët që, sipas tij, nuk po tregojnë përgjegjësi ndaj vendit.
Ai ka lënë të kuptohet se vendi mund të shkojë drejt zgjedhjeve të reja të jashtëzakonshme dhe ka uruar që qytetarët të mund të kontribuojnë “ashtu siç ua do zemra dhe ndërgjegjja”.
Në fund të postimit, shtoi se ndihet i gatshëm të rikthehet në politikë për të punuar me përgjegjësi në të mirë të qytetarëve dhe shtetit, duke nënvizuar dashurinë e tij për kombin dhe atdheun.
Postimi i plotë i Labit (pa ndërhyrje):
“Mirëdita shqiptar e gurbetqar!
Më vjen keq që shumë deputetë të këtyre zgjedhjeve parlamentare të fundit nuk e përjetuan se çfarë do të thotë të kesh përgjegjësi ndaj vendit sepse si duket vendi do të shkoj sërish në zgjedhje të jashtëzakonshme!
Uroj që në zgjedhjet e ardhshme ta keni fatin të kontribuoni ashtu siç ua do zemra dhe ndërgjegjja.Fat të mbarë Kosovës dhe Shqipërisë.
Unë besoj se tani jam gati të vazhdoj sërish, për të kryer punë përmes shtetit me përgjegjësi të plotë ashtu si ndaj familjes sime.
Punë që nuk do t’i kisha premtuar, por do t’i kisha kryer për çdo shqiptar e qytetar të cilët e duan Kosovën si familjen e vet.
E dini mirë se çdo shqiptari i jam përgjigjur me PO edhe kur unë kam sfiduar vetën dhe karrieren vetem që të jua lehtesoj jeten në kërkesat më të rënda të jetës së tyre, e aq më tepër në ato që i përkasin shtetit ku kam dhuruar mjete financiare me mundesi sepse kam kam dashur të kontribok në çdo fushë vetëm pse e dua kombin dhe atdheun më shumë se veten time.
Mos harroni se; përgjegjesia ndaj atdheut, është më e rënde se sa vdekja.
Me nderime,Labi – Kosovë e Shqipërisë”.
