Aeroporti i Mynihut në Gjermani u mbyll përkohësisht të shtunën mbrëma pas raportimeve për praninë e dronëve, të cilat autoritetet nuk arritën t’i verifikojnë, njoftoi policia federale.
Një nga aeroportet më të mëdha të Gjermanisë, Mynihu u rihap para mesnatës, ndërsa të dielën në mëngjes trafiku ajror funksiononte normalisht, konfirmuan autoritetet aeroportuale.
Sipas policisë federale dhe aeroportit, “vëzhgime të dyshimta” u raportuan nga disa persona, përfshirë zyrtarë të sigurisë dhe punonjës të aeroportit. Sipas njoftimit, pamjet e dyshuara u raportuan rreth orës 22:00 të së shtunës dhe zgjatën rreth 30 minuta, ndërsa një tjetër seri raportimesh ndodhi rreth orës 23:00, po për afërsisht gjysmë ore.
Ndikimi në fluturime dhe pasagjerë ishte i vogël, tha aeroporti të dielën. Tre fluturime u devijuan – dy prej të cilave më pas arritën të ulen në Mynih – ndërsa një nisje u anulua.
Policia federale bëri të ditur se nuk u gjetën dronë apo persona të dyshimtë në zonë.
Kjo mbyllje është e fundit në një seri ndërprerjesh pas fluturimeve misterioze të dronëve mbi hapësirën ajrore të vendeve anëtare të Bashkimit Evropian.
Më herët këtë muaj, Aeroporti i Mynihut ishte mbyllur dy herë brenda 24 orëve për shkak të raportimeve të ngjashme, duke prekur mijëra pasagjerë./AP
