Themeluesi i Mango-s, Isak Andic (71 vjeçar), vdiq në fund të vitit 2024, ndërsa po bënte ecje në malet Montserrat. Dhjetë muaj pas vdekjes së themeluesit spanjoll të rrjetit të veshjeve Mango gjatë një ecjeje në mal, raportet e medias thonë se policia po heton tani çështjen për vrasje të qëllimshme – me djalin e tij si të dyshuarin kryesor.
Hetuesit nga policia katalanase, Mossos d’Esquadra, nuk besojnë më se ishte një aksident që përfshinte Isak Andic dhe tani kanë vënë në shënjestër djalin e tij Jonathan.
Mediat spanjolle raportuan në atë kohë se ai kishte pësuar një aksident tragjik gjatë një shëtitjeje familjare në vargmalin Montserrat në rajonin e Katalonjës. Në atë kohë, Andiq ra në një humnerë 100 metra të thellë në një shteg që të çonte nga Shpellat e famshme Salnitre në Manastirin e Montserratit.
Në kohën e rënies fatale të biznesmenit, djali i tij Jonathan ishte afër. Deklaratat e tij ngjallën dyshime tek hetuesit. 44-vjeçari i tha policisë se dëgjoi një zhurmë si gurë që rrëshqisnin pas tij, dhe kur u kthye, pa të atin të binte për vdekje.
“Dëshmitari e kundërshtoi veten, i la gjërat të paqarta dhe përshkroi ngjarje që nuk përputhen me gjetjet e hetimit të policisë”, thuhet në raport, shkruan Indeksonline.
Dy deklaratat e tij – njëra menjëherë pas vdekjes së Andiqit, tjetra muaj më vonë – gjithashtu ndryshonin ndjeshëm. Për më tepër, partnerja e Andiqit, lojtarja profesioniste e golfit Estefania Knuth, theksoi “marrëdhënien e dobët midis babait dhe birit”. Me sa duket, të dy ishin takuar ditën e vdekjes së babait për të zgjidhur mosmarrëveshjet.
Isak Andiç lindi në metropolin turk të Stambollit. Kur ishte 14 vjeç, ai dhe familja e tij u zhvendosën në Barcelonë. Më vonë ai themeloi atje kompaninë Mango, e cila u zhvillua në një nga rrjetet më të mëdha të veshjeve në Evropë dhe tani operon rreth 2,800 dyqane në të gjithë botën.
Me një pasuri të vlerësuar nga revista Forbes në 4.5 miliardë dollarë (3.16 miliardë euro), Andiç ishte një nga njerëzit më të pasur në Spanjë dhe banori më i pasur i Katalonjës.
Djali i tij, Jonathan, është aktualisht Zëvendëskryetar i Bordit të Drejtorëve të Mango Fashion Group dhe Kryetar i Punta Na Holding, i cili përfshin kompanitë e tjera të familjes dhe kontrollon 95 përqind të kapitalit aksionar të Mango-s. Motrat e Jonathan, Judith Andic dhe Sarah Andic, shërbejnë si Zëvendëskryetare./Indeksonline/
