Ushtria izraelite ka goditur këtë të mërkurë një tjetër ndërtesë të lartë në qytetin e Gazës.
Mëngjesin e sotëm, zëdhënësi në gjuhën arabe i Forcave të Mbrojtjes së Izraelit (IDF), Avichay Adraee, publikoi një paralajmërim për evakuim për zonat pranë Portit të Gazës dhe pjesën jugore të lagjes Rimal, duke veçuar si objektiv ndërtesën shumëkatëshe Tablia Tower 2.
Në një postim në orën 10:45 sipas kohës lokale, Adraee paralajmëroi se godina do të sulmohej së shpejti. Rreth një orë më vonë, në 11:55, mediat palestineze raportuan se ndërtesa ishte goditur dhe ishte shembur.
Para orës 13:00, IDF pranoi zyrtarisht sulmin, duke deklaruar se Hamasi kishte në ndërtesë “pajisje për mbledhjen e inteligjencës” dhe “poste vëzhgimi për të monitoruar lëvizjet e forcave izraelite në zonë”.
Sipas Ministrisë së Shëndetësisë në Gaza, e drejtuar nga Hamasi, gjatë 24 orëve të fundit janë vrarë 41 persona në Rripin e Gazës.
Kjo e çon numrin e viktimave nga sulmet izraelite që prej tetorit 2023 në të paktën 64,656. Autoritetet lokale thonë se një numër trupash mbeten nën rrënoja, por ekipet e shpëtimit nuk kanë mundur të arrijnë tek ta.
Shifrat e ministrisë konsiderohen të besueshme nga OKB dhe institucionet ndërkombëtare, megjithatë ato nuk bëjnë dallim mes civilëve dhe luftëtarëve./BBC
