Kryesuesi i Bordit të BQK-së, Bashkim Nurboja ka shkelur ligjin.
Ai publikisht, përmes një postimi në rrjete sociale ka bërë thirrje për të votuar gruan e tij, kandidate për asamble nga radhët e VV-së.
Mimoza Nurboja është bashkëshortja e tij, e cila mban numrin 16 në listën e VV-së për Komunën e Pejës, kandidat për kryetar të kësaj komune nga të cilët është Taulant Kelmendi.
Bashkim Nurboja, në shkurt të vitit 2023, është zgjedhur kryesues i Bordit të BQK-së.
“Bordi i Bankës Qendrore të Republikës së Kosovës, në mbledhjen e mbajtur më 3 shkurt 2023, mori vendimim si në vijim: Bashkim Nurboja është zgjedhur kryetar i Bordit të Bankës Qendrore. Gjithashtu, Bordi u njoftua me Raportin mujor të Guvernatorit/Bordit Ekzekutiv”, kishte njoftuar BQK.
Sipas Ligjit për Bankën Qendrore të Republikës së Kosovës, Bordi i Bankës Qendrore përbëhet nga Guvernatori dhe katër (4) anëtarë joekzekutivë, të cilët ngarkohen me detyrën e aprovimit dhe mbikëqyrjes së zbatimit të politikave, si dhe mbikëqyrjen e administrimit dhe të aktiviteteve të Bankës Qendrore.
Kujtojmë se Bashkim Nurboja ka qenë kandidat për deputetë nga radhët e VV’së si dhe ka qenë kandidat për kryetar të Pejës nga kjo parti në vitin 2017.
