Dega e Partisë Demokratike të Kosovës (PDK) në Gjilan ka dorëzuar një kallëzim penal në Prokurorinë Speciale ndaj kryetarit të Komunës, Alban Hyseni, nën dyshimet për keqpërdorim të detyrës zyrtare dhe keqmenaxhim të financave publike.
Sipas PDK-së, kallëzimi bazohet në të gjeturat e raportit të Zyrës Kombëtare të Auditimit për vitin 2024, ku janë evidentuar shkelje të qarta ligjore në menaxhimin financiar të Komunës. Partia opozitare thekson se vetë menaxhmenti komunal i ka pranuar gjetjet e auditimit si të sakta, duke u shprehur se “pajtohet” me to, transmeton lajmi.net
PDK-ja konsideron se kjo përbën pranim të përgjegjësisë institucionale dhe e forcon dyshimin për kryerjen e veprave penale të dënueshme, sipas neneve 414 dhe 415 të Kodit Penal të Republikës së Kosovës, që lidhen me keqpërdorimin e pozitës apo autoritetit zyrtar dhe menaxhimin e pasurisë publike.
Si pjesë e kallëzimit penal, partia ka dorëzuar edhe raportin zyrtar të auditimit si provë shtesë për të mbështetur dyshimet e ngritura ndaj kryetarit Hyseni./lajmi.net/
