Forcat gjermane organizuan garën tradicionale ushtarake “Saulauf” në Kampin Bondsteel në Kosovë, duke bërë bashkë 12 ekipe nga 5 shtete të KFOR-it – përfshirë Finlandën, Gjermaninë, Poloninë, Letoninë dhe Shtetet e Bashkuara të Amerikës.
KFOR tha se “garuesit i shtynë limitet e tyre përmes një vrapimi prej 6.5 kilometrash dhe pesë stacioneve intensive”.
“Stacionet përfshinin tërheqjen e një kamioni, zhytjen nëpër akull, hedhjen e granatave, qitje me shenjë dhe transportimin e një të plagosuri prej 80 kg, pastaj secila skuadër dha gjithçka nga vetja. Në fund, Letonia fitoi”.
KFOR tha se këto gara nuk ndërtojnë vetëm muskuj – “ato shërbejnë për të ndërtuar dhe ruajtur besimin, shoqërinë, solidaritetin, respektin e ndërsjellë dhe bashkëpunimin shumëkombësh brenda KFOR-it”.
KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt dhe të mbrojtur për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.
KFOR-i punon në koordinim të ngushtë me Policinë e Kosovës dhe Misionin e Bashkimit Europian për Sundimin e Ligjit në Kosovë (EULEX) në rolet e tyre përkatëse si reagues të sigurisë./Express/
