Ndihmësi kryesor i Putinit dhe negociatori kryesor rus Kirill Dmitriev shpërndau një postim në rrjetet sociale të presidentit Donald Trump, ku paraqiteshin kërkesat për Ukrainën përpara bisedimeve të SHBA-së me udhëheqësit europianë të hënën, shkruan CNN.
Kirill shpërndau postimin e Trump në TruthSocial, në të cilin presidenti tha se Ukraina mund ta përfundojë luftën nëse i dorëzohet kërkesave kryesore ruse – duke përfshirë heqjen dorë nga Krimea, të cilën Rusia e aneksoi në mënyrë të paligjshme në vitin 2014, dhe të pranojë që të mos anëtarësohet kurrë në NATO.
“(Trump) dhe ekipi i tij po shtyjnë për zgjidhjen e vërtetë. Le të mbizotërojë zgjidhja e problemeve dhe paqja gjatë Ditës së Madhe”, shkroi Dmitriev në X, duke iu referuar takimit të së hënës me presidentin ukrainas Volodymyr Zelensky.
Një delegacion i udhëheqësve europianë do t’i bashkohet Zelenskyt në Washington, DC, në një përpjekje të koordinuar për të mbështetur Kievin dhe për ta formësuar të ardhmen e mbështetjes perëndimore për Ukrainën.
Kirill, i cili gjithashtu drejton fondin sovran të pasurisë së Rusisë, ishte ndër disa zyrtarë rusë që iu bashkuan presidentit Vladimir Putin në Alaskë të premten për t’u takuar me Trump në një takim të ndjekur nga afër. Nuk u arrit ndonjë marrëveshje gjatë takimit, por administrata e Trump tha se ata bënë përparim të madh.
