Italianët po shmangin shkuarjen në plazhe private këtë verë, duke shpjeguar se kjo është një shprehje e qartë e rebelimit kundër çmimeve të larta të vendosura nga pronarët e koncesioneve private.
Sezoni i këtij viti filloi me një rënie të dukshme të numrit të vizitorëve, pasi vendpushimet private përgjatë bregdetit italian regjistruan një rënie prej 15 deri në 25 për qind në qershor dhe korrik krahasuar me të njëjtën periudhë të vitit të kaluar.
Rënia e numrit të vizitorëve ka përkuar me rritjen e çmimeve në plazhet private, si edhe me rezistencën në rritje ndaj dominimit të tyre përgjatë bregdetit italian, duke lënë gjithnjë e më pak hapësirë për plazhe të lira.
Të shkosh në plazh dhe të marrësh me qira kabina, shezlongje dhe çadra dielli janë pjesë e kulturës italiane të pushimeve. Problemi i mungesës së vizitorëve nuk është aq i theksuar gjatë fundjavave, kur plazhet shpesh janë të mbushura me njerëz, por gjatë javës. Ata që vijnë shpenzojnë gjithashtu më pak për ushqim dhe pije.
Fabrizio Licordari, president i shoqatës Assobalneari Italia, e cila përfaqëson klubet dhe baret në plazh, ia atribuon rënien e numrit të mbërritjeve kostos së lartë të jetesës dhe ndikimit të saj në fuqinë blerëse.
“Edhe me dy paga, shumë familje mezi ia dalin mbanë. Në rrethana të tilla, është e natyrshme që ndër shpenzimet e para që do të shkurtohen janë ato për kohën e lirë, argëtimin dhe pushimet”, i tha ai agjencisë së lajmeve Ansa.
Çmimi i qirasë së shezlongjeve është gjithashtu një temë e shpeshtë diskutimi. Sipas shoqatës së konsumatorëve Altroconsumo, ato aktualisht janë mesatarisht 17 për qind më të shtrenjta sesa ishin katër vjet më parë.
Në plazhet në rajonin e Lacios, është e vështirë të marrësh me qira dy shezlongje dhe një ombrellë për më pak se 30 euro, dhe çmimi në vendpushimin popullor të Galipolit në rajonin e Pulias rritet në 90 euro në ditë./Indeksonline/
