Turqia ka zbuluar rezerva të reja prej 57 milionë fuçish naftë, me një vlerë të vlerësuar ekonomike rreth 4 miliardë dollarë. Lajmi u bë i ditur nga ministri i Energjisë dhe Burimeve Natyrore, Alparslan Bayraktar, gjatë një interviste për agjencinë e lajmeve Anadolu.
Ministri konfirmoi gjithashtu se në pusin Göktepe-3 në Detin e Zi është zbuluar një sasi prej 75 miliardë metrash kub gaz natyror, që sipas tij, është e mjaftueshme për të përmbushur nevojat vjetore të vendit për rreth 1.5 vjet, ose për të furnizuar banesat për afro 4.5 vjet.
“Sasia e zbuluar e gazit përfaqëson një vlerë ekonomike prej rreth 30 miliardë dollarësh,” tha Bayraktar. Ai shtoi se kërkimet intensive në tokë, veçanërisht në rajonet e Diyarbakır, Gabar dhe Batman, kanë çuar në identifikimin e rezervave të rëndësishme të naftës.
Sipas ministrit, procesi i eksplorimit vijon me ritme të larta dhe priten zbulime të tjera deri në fund të vitit, të cilat mund të rrisin më tej kapacitetet energjetike të vendit.
