Njësia policore e Komunikacionit Rrugor në Ferizaj ka ndaluar dy automjete, një Opel me targa të huaja dhe një Daimler Benz me targa vendore, të dy duke qarkulluar me shpejtësi jashtë normave.
Shoferët L.I., 26 vjeç, dhe B.D., 25 vjeç, janë kapur duke zhvilluar gara shpejtësie në rrugën “Driton Islami”, ku kufizimi i lejuar i shpejtësisë është 50 km/h.
Sipas policisë, ata qarkullonin me shpejtësi prej 91 km/h, shpejtësi kjo e matur me veturën inteligjente të policisë.
Për këto kundërvajtje, të dy shoferëve u janë shqiptuar masa ndëshkuese që përfshijnë gjobë prej 500 euro secilit, 5 pikë negative në patentë, si dhe ndalim i drejtimit të automjetit për 12 muaj.
Policia apelon për respektim të rregullave të trafikut dhe kujdes maksimal në rrugë për sigurinë e të gjithë qytetarëve.
