Pas krijimit të një marrëdhënieje të ngushtë politike, dy miliarderët sollën ndryshime të rëndësishme në Uashington. Tani aleanca e tyre është vënë në pikëpyetje.
Më pak se një javë pasi lavdëruan njëri-tjetrin në Zyrën Ovale, presidenti i SHBA-së, Donald Trump, dhe Elon Musk, njeriu më i pasur në botë, u përplasën në mënyrë spektakolare dhe publike.
Në një luftë fjalësh që u përshkallëzua të enjten, të dy shfrytëzuan platformat e tyre të rrjeteve sociale për të sulmuar njëri-tjetrin, raporton euronews.
Miliarderi i lindur në Afrikën e Jugut kishte vendosur të distancohej nga puna me qeverinë amerikane për t’u përqëndruar në bizneset e tij, të cilat kanë pësuar pasojë nga përfshirja në politikë.
Edhe pse shumë analistë politikë parashikuan që aleanca e tyre nuk do të zgjaste, shpejtësia me të cilën u shkatërrua ishte megjithatë dramatike, transmeton Telegrafi.
Vetëm të premten e kaluar, Trump lavdëroi punën e Muskut si drejtues i Departamentit të Efikasitetit Qeveritar (DOGE), duke mbikëqyrur uljen e shpenzimeve federale, të cilat kapën shifrat e miliarda dollarëve.
Duke folur në ceremoninë e largimit në Shtëpinë e Bardhë të premten e kaluar, presidenti i SHBA-së e quajti Muskun “një nga liderët dhe inovatorët më të mëdhenj të biznesit që bota ka prodhuar ndonjëherë”.
“Ai u përpoq që talentin e madh që posedon, ta vendos në shërbim të kombit tonë dhe ne e vlerësojmë këtë”, tha 78-vjeçari.
“Dua vetëm të them se Elon ka punuar pa lodhje duke ndihmuar në udhëheqjen e programit më të gjerë dhe me rëndësi të madhe të reformës qeveritare ndër breza,” shtoi ai.
Në përgjigje, Musk, i cili mori një çelës të artë me stemën e Shtëpisë së Bardhë, tha se do të vazhdojë të vizitojë Trump si “mik dhe këshilltar”.
Duke parë dekorimet e reja të arta në dhomë, sipërmarrësi tha se “Zyra Ovale ka marrë më në fund madhështinë që i takon falë presidentit”.
Por, shkëlqimi i marrëdhënies së tyre të ngushtë më parë tani është zhdukur plotësisht.
Pas prishjes së miqësisë mes dy miliarderëve këtë javë dhe thellimit të mosmarrëveshjes së tyre, janë ngritur pyetje rreth dëmit që dy nga njerëzit më të fuqishëm në botë mund t’i shkaktojnë njëri-tjetrit.
Ndërsa Musk mund të mos japë dhjetëra miliona dollarë nga donacionet e premtuara për fushatë, Trump ka kërcënuar se do të privojë kompanitë e Musk nga miliarda dollarë kontrata dhe subvencione qeveritare.
‘Ligji i madh i shëmtuar’
Përçarja publike mes dy burrave filloi të merr hov të martën, kur Musku përdori X për të kritikuar “ligjin e madh dhe të bukur” të Trumpit.
Musk, i cili thotë se ligji e dëmton çdo kursim të bërë nga DOGE, nisi ta dënonte ashpër atë gjatë kësaj jave.
Ligji, i cili kaloi me pak vota në Dhomën e Përfaqësuesve muajin e kaluar, por përballet me sfida në Senat, përfshin ulje të mëdha taksash dhe ngritjen e kufirit të borxhit kombëtar.
I’m sorry, but I just can’t stand it anymore.
This massive, outrageous, pork-filled Congressional spending bill is a disgusting abomination.
Shame on those who voted for it: you know you did wrong. You know it.
— Elon Musk (@elonmusk) June 3, 2025
Ligji është “masiv, i papranueshëm, i mbushur me shpenzime të kota” dhe një “shëmtirë e neveritshme”, tha Musk.
Drejtori i Teslës gjithashtu kritikoi ashpër republikanët në Dhomën e Përfaqësuesve për votimin e asaj që ai e quan “ligji i madh dhe i shëmtuar”, për të cilin pretendon se do të rrisë deficitin e SHBA-së në 2.5 trilionë dollarë (2.19 trilionë euro).
Mosmarrëveshje në përshkallëzim
Pavarësisht gjuhës së fortë të Musk, konflikti mes tij dhe Trumpit nuk u përshkallëzua plotësisht deri të enjten.
Të enjten në mëngjes, Musk ripostoi disa mesazhe të vjetra të Trumpit në rrjetet sociale, përfshirë një ku tani presidenti i SHBA-së thoshte se “asnjë anëtar i Kongresit nuk duhet të jetë i kualifikuar për rizgjedhje” nëse buxheti i vendit nuk është i balancuar.
“Nuk mund të pajtohem më shumë”, shkroi Musk, duke kritikuar drejtpërdrejt ligjin e gjerë të taksave dhe shpenzimeve të Trump.
Rreth mesditës të enjten, Trump iu përgjigj në Zyrën Ovale gjatë një vizite nga kancelari gjerman, Friedrich Merz.
Trump tha se ishte “shumë i zhgënjyer” me Muskun, para se të shprehte dyshime nëse “marrëdhënia e tyre e madhe” do të vazhdonte.
Mospajtime u bënë më personale, me Muskun, i cili i dha fushatës së Trumpit qindra miliona dollarë vitin e kaluar, duke thënë se presidenti amerikan nuk do të ishte në Shtëpinë e Bardhë pa ndihmën e tij.
“Pa mua, Trump do të kishte humbur zgjedhjet, demokratët do të kontrollonin Dhomën dhe republikanët do të ishin 51-49 në Senat,” shkroi Musk në X.
“Çfarë mosmirënjohjeje,” përfundoi ai.
Përshkallëzim i tensionit
Gjërat arritën kulmin më vonë të enjten pasdite.
“Mënyra më e lehtë për të kursyer para në buxhetin tonë, miliarda e miliarda dollarë, është të ndalohen subvencionet dhe kontratat qeveritare për Elonin,” shkroi Trump në platformën Truth Social.
“Gjithmonë më ka habitur që Biden nuk e bëri këtë!”, shtoi ai.
Musk iu kundërpërgjigj duke pretenduar se emri i Trumpit shfaqet në dosjet e pedofilit dhe financierit të shkatërruar Jeffrey Epstein, duke akuzuar se kjo është “arsyeja reale pse ato nuk janë bërë publike”.
Time to drop the really big bomb:@realDonaldTrump is in the Epstein files. That is the real reason they have not been made public.
Have a nice day, DJT!
— Elon Musk (@elonmusk) June 5, 2025
Shtëpia e Bardhë tha të enjten në mbrëmje se akuza e Muskut për Epstein ishte një “episod i keq”.
Administrata e Trump ka sugjeruar se kritikat e miliarderit të teknologjisë ndaj ligjit historik rrjedhin nga zhgënjimi i tij që ligji nuk përmban politika të favorshme për të, diçka që e ka mohuar Musku.
Deri të enjten në mbrëmje, dukej se Musk ishte i gatshëm të qetësonte situatën.
Pas shkrimit të Bill Ackman, një aleat i Trumpit dhe miliarder në fonde ‘hedge’, i cili tha se dy burrat “duhet të bëjnë paqe për të mirën e vendit tonë të madh”, Musk iu përgjigj se nuk ishte “gabim”. /Telegrafi/