Melos Nallbani ka arritur një sukses të madh qysh në paraqitjen e tij të parë si trajner në një turne Grand Slam.
Trajneri i ri nga Peja ndodhet aktualisht në Paris, në turneun Roland Garros për juniorë, ku po e drejton me sukses tenistin e talentuar Savva Rybkin.
Pas kualifikimit me sukses në dy xhiro, Rybkin, nën udhëheqjen e Melos Nallbanit, e mposhti francezin Aaron Gabet në xhiron e parë të Main Draw me rezultatin 2-1 në sete (4/6, 7/6 dhe 6/2). Në xhiron e dytë, e pret sfida kundër kolumbianit Alejandro Arcila.
“Jam shumë krenar dhe i emocionuar që jam pjesë e Roland Garros. Para pak vitesh ishte vetëm një ëndërr, por tani është bërë realitet. Jam falënderues ndaj Akademisë Ljubicic për rastin e dhënë, si dhe ndaj Klubit të Tenisit Peja, ku hodha hapat e parë të karrierës sime,” ka thënë Melos Nallbani për Telegrafin.
Melos është trajneri i parë shqiptar që ka arritur të drejtojë një tenist në një turne Grand Slam.
Ai është pjesë e “Ljubicic Tennis Academy”, e drejtuar nga ish-trajneri i Roger Federer, Ivan Ljubicic./Telegrafi/
