Një operacion i befasishëm i Policisë së Burgjeve në paraburgimin e Durrësit ka çuar në sekuestrimin e 12 aparateve celularë, të gjetur në zonën e gjelbër të institucionit. Ende nuk dihet nëse telefonat po përdoreshin nga të paraburgosurit apo ishin fshehur në tentativë për t’u futur në qeli.
Të gjitha pajisjet janë dërguar për ekspertizë, ku përveç verifikimit të komunikimeve, do të analizohen edhe gjurmët e gishtave për të identifikuar përdoruesit. Parallelisht, Drejtoria e Burgjeve ka nisur një hetim të thelluar për mënyrën si janë futur këto mjete të ndaluara në ambientet e paraburgimit.
Për zbardhjen e ngjarjes pritet të ndihmojnë kamerat e sigurisë brenda dhe jashtë institucionit. Në këtë burg aktualisht ndodhen edhe zyrtarë të arrestuar nga SPAK, mes tyre ish-ministri Ilir Beqaj, ish-deputetët Jurgis Çyrbja e Alqi Bllako, si dhe kryebashkiaku i Tiranës, Erion Veliaj.
