Me pikëllim të madh është pritur lajmi për ndarjen nga jeta të Naim Kerollit, njërit prej figurave qendrore të rezistencës kombëtare dhe bashkëluftëtar i hershëm i Ushtrisë Çlirimtare të Kosovës.
Ish-komandanti i UÇK-së, Sami Lushtaku, ka reaguar përmes një postimi prekës në rrjetet sociale, duke shprehur dhimbjen për humbjen e mikut dhe bashkëveprimtarit të ngushtë.
“Me dhimbje të thellë mora lajmin për vdekjen e bashkëluftëtarit, njërit prej themeluesve të celulave të para të UÇK-së, mikut tim, burrit të fjalës, Naim Kerolli,” shkruan Lushtaku.
Ai e ka përshkruar Kerollin si një patriot të madh, luftëtar të dalluar dhe veprimtar të pandalshëm të çështjes kombëtare, duke theksuar se kontributi dhe virtytet e tij do të mbesin të pashlyeshme në kujtesën kolektive.
“Ai do të mbetet në kujtesën tonë për vlerat dhe virtytet që i ka bartur deri sa përfundimisht pushoi së rrahuri zemra e tij, pak orë më parë,” shton më tej Lushtaku.
Në fund, Lushtaku ka shprehur ngushëllimet e tij për familjen Kerolli, miqtë, bashkëluftëtarët dhe të gjithë dashamirët e të ndjerit.
Drenica humbi sot një bir të çmuar dhe një simbol të qëndresës.
