Qytetarët e Mariupolit, qytetit të rrethuar nga rusët, po përjetojnë ditë ferri. Nënkryetari i këtij qyteti tha se nuk e di saktësisht se sa njerëz janë vrarë, por tregon se shifra e fundit që e dinë është 1,207 persona.
“Këta janë vetëm trupat që kemi mbledhur në rrugë”, tha Sergei Orlov për BBC.
Associated Press ka publikuar një fotografi të të vrarëve, trupat e të cilëve hidhen në një varr masiv, përcjell Gazeta Express.
“Trupat e pajetë vendosen në një varr masiv në periferi të Mariupol, Ukrainë, e mërkurë, 9 mars 2022, pasi njerëzit nuk mund t’i varrosin të vdekurit e tyre për shkak të bombardimeve të rënda nga forcat ruse. (AP Photo/Evgeniy Maloletka)”, thuhet në përshkrimin e AP.
Orlov tha se 47 persona janë varrosur në një varr masiv, në pamundësi për të shkuar në varrezat jashtë qytetit.
“Jo të gjithë ata u identifikuan”, shtoi ai.
