Kreu i Aleancës Kosova e Re, Behgjet Pacolli, ka demantuar lajmin se partia e tij është e hapur për bashkëpunim me Lëvizjen Vetëvendosje.
Përmes një postimi në rrjetin social Facebook, Pacolli ka thënë se këto lajme janë të pavërteta dhe se AKR do të qëndrojë në opozitë që nga fillimi, shkruan Reporteri.net.
Ai po ashtu ka deklaruar se partia e tij ka pranuar rezultatin zgjedhor dhe vlerëson se procesi duhet të përmbyllet shpejt dhe të krijohen institucionet e reja.
Ndryshe, në zgjedhjet e mbajtura më 14 shkurt, fituese doli partia e Albin Kurtit me 47,88%, ndërsa në vendin e dytë dhe të tretë u radhitën PDK me 17,36% dhe LDK me 13,08% të votave.
Sipas rezultateve preliminare të KQZ-së me 99.16% të votave të numëruara, AAK do të jetë partia e katërt dhe e fundit shqiptare në legjistalutrën e tetë të Kuvendit të Republikës së Kosovës, pasi që edhe siç pritej, Nisma Socialdemokrate e Fatmir Limajt nuk ka arritur të sigurojë votat e mjaftueshme për të kaluar pragun zgjedhore pasi ka marrë vetëm 2,58%.
Ky është postimi i plotë i Pacollit:
Lajmet që po qarkullojnë në media për gjoja ofrimin e AKR, për të qenë pjesë e koalicionit qeverisës janë të pavërteta.
AKR ka pranuar rezultatin zgjedhor dhe vlerëson se procesi duhet të përmbyllet shpejt (zgjedhjet te çertifikohen dhe të krijohën institucionet të reja nga ata që e kanë këtë përgjegjësi).
AKR do të qendron ne opozitē qe nga fillimi!
