Anëtari i VV-së, Xhelal Sveçla, po habitet me formën se si njerëzit i ndryshojnë qëndrimet e tyre.
Ai ka hedhur një status në Facebook, ku shprehi habinë se si miqtë kosovarë që mbështetën Trumpin, tash po pajtohen me Biden, shkruan Syri Kosova.
Sveçla fjalën e kishte për partitë në pushtet e opozitë që u deklaruan pro-Trumpit, të cilët patën reagime të mira për letrën që Biden ia dërgoi Vuçiqit.
“Çka s’po shohim. Shokët e Grenellit e mbështetësit e Trumpit, po mburren me presidentin Biden.
Janë shumë të dobët, por dobësia e tyre nuk duhet të bëhet dobësi e Kosovës.
Kur Albin Kurti e mbështeti presidentin Biden haptazi në fushatë, e bëri sepse e dinte qëndrimin e Joe Biden në mbështetje të Kosovës.
Ndërsa këta që “ua ka bërë Zoti verë e raki” na qortonin se pse e mbështetëm Bidenin.
Kjo që Biden i ka kërkuar Vuçiqit, – mutual recognition – i bie njohje e ndërsjelltë, pra reciprocitet. Ndërsa këta shokët e Grenellit, për me largu reciprocitetin e rrëzuan qeverinë në mes të pandemisë.
Janë shumë të pafytyrë, por pafytyrësia e tyre nuk do të qeverisë më me Kosovën.
Presidenti Biden do ta ketë partnerin legjitim dhe të denjë për bashkëpunim në Kosovë, Albin Kurtin” tha ai.
