Anëtarja e Kryesisë së Lëvizjes Vetëvendosje, Albulena Haxhiu, i është përgjigjur presidentit Thaçi, pas akuzave të këtij të fundit ndaj partisë së Albin Kurtit, përcjell Gazeta Blic.
Në një shkrim në Facebook, Haxhiu ka thënë se Pyetjen për thika e harta presidenti është shumë vonë t’ja bëjë dikujt tjetër.
Madje, Haxhiu thotë se që ka pasur thika mbi harta, është konfirmuar edhe nga Richard Grenell dhe ish-zyrtari i Shtëpisë së Bardhë, John Bolton.
“Pyetjen për thika e harta presidenti është shumë vonë t’ja bëjë dikujt tjetër. Pyetja e tij është pyetje ekskluzivisht për vetën, anipse përgjigjen e dijmë, madje të vërtetën. Tash pasi kjo gjë u vërtetua e stërvërtetua nga vet Grenell e Bolton nuk ka pse i bën pyetjet përgjigjet e së cilave i kemi të mirënjohura. Përtej kësaj, edhe para përgjigjeve të zyrtarëve amerikan kemi deklaratat e vet presidentit, nga deklarata në forumin e Alpbach në Austri, ku deklaronte se është i gatshëm edhe për marrëveshje ku përfshihen lëvizjet e kufijve, e deri te quajtja e veriut të vendit dhuratë e Rankoviqit, s’janë asgjë tjetër pos përpjekje me thika mbi hartën e Kosovës”, ka shkruar Haxhiu.
Ky reagim i saj ka ardhur pas akuzave të presidentit Thaçi, drejtuar Lëvizjes Vetëvendosje, rreth deklarimeve për “thika mbi harta të Kosovës”.
Thaçi u shpreh se ata duhet t’i kërkojnë falje popullit të Kosovës, për këto deklarata.
