Albert Krasniqi nga “Demokracia Plus” ka komentuar zhvillimet politike pas vendimit të Gjykatës Kushtetuese.
Krasniqi në “Debat Plus” me Ermal Pandurin në RTV Dukagjini ka thënë se vendimi i Gjykatës Kushtetuese ndaj dekretit te Presidentit ka qenë vendim i arsyeshëm, përcjell Telegrafi.
“Duke pasur parasysh kontestimet që i kishte bërë Lëvizja Vetëvendosje, potencialisht do të kishim dy qeveri që do të kontestonin njëra-tjetrën e që do të mund të ekskalonte në rritje të tensioneve ose më të keqen të kishim skenarin e Maqedonisë me përleshje jashtë Kuvendit apo edhe brenda objektit”.
Ai thotë se një skenar i tillë nuk është se nuk është paralajmëruar nga akterë të ndryshëm.
Përfaqësuesi i shoqërisë civile thotë se me këtë vendim ndalet edhe koha prej 15 ditësh që i takonte Avdullah Hotit për formimin e qeverisë.
Krasniqi thotë se nëse LDK do të ftonte seancën menjëherë pas dekretit të Presidentit Gjykata Kushtetuese nuk do të kishte mundur të veprojë.
“Duket se LDK nuk i ka bërë llogaritë mirë, pasi kanë menduar se Gjykata nuk do të vepronte në një ditë feste siç është 1 maji”, tha ndër të tjera Albert Krasniqi.
