Ministri në detyrë i Financave dhe Transfereve, Besnik Bislimi, i ka rënë pishman deklarimeve të bëra para pesë ditësh, se ka mundësi të ulen pagat në sektorin publik, për shkak të vështirësive financiare, që mund të shkaktojë pandemia COVID-19.
Në një shkrim në Facebook, Bislimi, e thotë të kundërtën e asaj që e kishte thënë para disa ditësh.
Thotë se raportimet e sotme, se do të ketë zvogëlim të pagave në sektorin publik janë të pavërteta.
Por, çka kishte deklaruar vetë Bislimi ditë më parë.
“Nuk mundet kriza me vazhdu edhe dy muaj e ne mos me i prek edhe rrogat e sektorit publik”. Ka opsione të ndryshme: Nëse ne themi jemi në muaj të mbijetesës, dhe jemi në muajt ku po punojmë vetëm me staf esencial, unë nuk e di pse mbijetesa duhet me qenë ndryshe për gjyaktës dhe ndryshe për një zyrtar financiar”, thoshte ai.
Bislimi shkonte edhe më tej, thoshte se favorizon opsionin për zbritje të pagave në 400 euro për sektorin publik.
“Një opsion mundet me qenë të gjithë të punësuarit në sektorin publik, përjashto sektorin e shëndetësisë dhe të policisë qe janë në angazhim maksimal e kanë pagën e njëjte 400 euro, 400 euro. Unë përsonalisht e kisha favorizu një opsion të tillë”, kishte thënë Bislimi.
E sot, pendohet, duke thënë se kjo nuk është e vërtetë.
E një ulje të tillë të pagave në sektorin publik, e kanë kërkuar edhe përfaqësuesit e biznesve dhe odat ekonomike vendore.
Ata kanë theksuar që vendit i duhet një pako prej 300 milionë eurosh për sektorin privat dhe sipas analizës së tyre, kjo shumë mund të alokohet nëse ndahen një pjesë nga buxheti që shkon në paga të sektorit publik.
