Pas pak minutash skadon zyrtarisht pezullimi i Ligjit të pagave, të cilin në dhjetor të vitit 2019 e kishte pezulluar Gjykata Kushtetuese e Kosovës.
Ligji i pagave ishte pezulluar deri më 30 mars nga Kushtetuesja pas kërkesës nga Avokati i Popullit.
KALLXO.com, mëson se në lidhje me ketë çështje pritet që nesër të vendoset nga Gjykata Kushtetuese e Republikës së Kosovës.
Ky Ligj përcakton rrogat për secilin zyrtar publik në Kosovë. Me këtë Ligj rregullohen edhe rrogat e kryeministrit, presidentit e deri te rrogat e punonjësve të sistemit gjyqësor.
Këtë Ligj e kishin kundërshtuar institucione të ndryshme pasi kishin mbetur poshtë me koeficientin i cili rregullonte rrogat.
Pas 35 ankesave të cilat ishin paraqitur tek Avokati i Popullit, ai kishte vendosur që këtë Ligj ta dërgojë në Kushtetuese në mënyrë që të vlerësohet nëse ky Ligj prek interesat e ankuesve.
Ndaj këtij Ligji ishin ankuar edhe zyrtarë të Administratës Tatimore të Kosovës. Ata kishin shfaqur pakënaqësitë me Ligjin e pagave pasi ishin lënë poshtë me koeficient.
Rroga më e lartë sipas këtij ligji i takon presidentit të Republikës, duke e pasur kështu koeficientin 10, i cili nënkupton 2,390 euro rrogë.
239 euro më pak në rast të zbatimit të këtij Ligji pritet të marrin kryeministri, kryetarja e Kuvendit dhe Kkryetarja e Gjykatës Kushtetuese ndërsa nga 1,912 euro marrin krerët e sistemit të drejtësisë.
Nga 1,852 euro rrogë është paraparë të marrin kryetarët e komunave.
