Kompania EasyJet ka vendosur t’i ndërpresë të gjitha fluturimet për shkak të pandemisë së koronavirusit.
Përmes një deklaratë të publikuar të hënën, kjo kompani njoftoi se i ka përfunduar fluturimet emergjente të dielën dhe tash do t’i dërgojë punëtorët në pushim prej dy muajve.
“Si rezultat i kufizimeve të pashembullta ndaj udhëtimeve, të vendosura nga qeveritë për shkak të pandemisë së koronavirusit, dhe si rezultat i zbatimit të karantinave në shumë shtete evropiane, EasyJet sot i ka ndërprerë të gjitha fluturimet”, thuhet në deklaratë.
Kompania njoftoi se i ka kryer 650 fluturime për t’i kthyer udhëtarët në vendet e tyre. Nga këto fluturime kanë përfituar mbi 45 mijë udhëtarë.
Në deklaratë thuhet se ende nuk dihet data e rifillimit të fluturimeve, por situata do të vlerësohet në bazë të rregulloreve në fuqi dhe në bazë të kërkesës.
Numri i fluturimeve në nivel global ka rënë me të madhe pas vendimit të shteteve për kufizimin e qarkullimit ndërkombëtar, shkruan “SkyNews”, transmeton Gazeta Express.
