Ndalimi ose kufizimi i lëvizjes së lirë të qytetarëve sipas Kushtetutës së Republikës së Kosovës mund të bëhet vetëm në rastet kur vendi është në gjendje të jashtëzakonshme. Kështu tha sot, ish-kryetari i Gjykatës Kushtetuese, Enver Hasani.
Sipas tij, Qeveria mund të kufizojë lëvizjen në rajone të caktuara por jo në tërë territorin e Republikës së Kosovës, derisa nuk ekziston gjendja emergjente.
Ndërkohë sonte qeveria e udhëhequr nga Albin Kurti shpalli vendimin për ndalimin e qarkullimit të veturave dhe qytetarëve në këto orare: Nga ora 10:00 e mëngjesit deri në ora 16:00 pasdite dhe prej orës 20:00 në mbrëmje deri në ora 06:00 në mëngjes.
E gjithë kjo bazuar në Ligjin për Parandalimin dhe Luftimin e Sëmundjeve Ngjitëse, neni 41.2, i cili lejon ‘ndalimin e qarkullimit në rajonet e infektuara ose drejtpërsëdrejti të rrezikuara’.
Presidenti i Kosovës Hashim Thaçi tha se me këtë vendim Kurti shkeli Kushtetutën dhe paralajmëroi dërgimin e rastit në Gjykatën Kushtetuese.
Kundër këtij vendimi të qeverisë kanë dalë edhe udhëheqësit e partive kryesore në vend.
Kosova deri më tani ka 61 raste me koronavirus.
