Ish-deputeti i Lidhjes Demokratike të Kosovës, Adem Salihaj ka komentuar situatën aktuale politike në vend, duke thënë se edhe ish-ministri, Agim Veliu e po ashtu edhe kreu i Qeverisë, Albin Kurti kanë gabuar.
Salihaj ka apeluar që të ndalet lufta midis LDK-së dhe LVV-së, duke shtuar se duhet që të merren me situatën aktuale pas përhapjes së koronavirusit.
“Apeloj të ulen kryetari i LDK-së dhe ai i Vetëvendosjes, të tregohen të arsyeshëm dhe të gjejnë zgjidhje, pa e futur Kosovën në një krizë pa rrugëdalje, e cila mund të shndërrohet në anarki. Pra, ka zgjidhje, nëse duam.
Nuk humbet burrëria e LDK-se nëse e zëvendëson ministrin e Punëve të Brendshme me një emër tjetër, duke ia tërhequr vërejtjen kryeministrit Kurti se kjo është vërejtja e fundit për të. Por, as nuk humbet burrëria e Albin Kurtit nëse e rikthen Agim Veliun në pozitën e tij të deritashme, poashtu duke ia tërhequr vërejtjen se nuk duhet të jetë kundër kryeministrit. Kosova ka rrezik të shkatërrohet nga veprime iracionale. Ose këto që i thash janë vetëm pretekste, pra, pas gjithë kësaj fshehen skenarë krejt tjerë”, thotë ai.
