Vetëm gjatë 24 orëve të kaluara, 462 persona kanë vdekur dhe rreth 4500 janë infektuar me koronavirus në Spanjë. Këto shifra e kanë çuar në 2182 numrin e përgjithshëm të viktimave, kurse në mbi 33 mijë numrin e të infektuarve.
Sipas autoriteteve, mbi 2300 persona të infektuar ndodhen nën kujdes intenziv, ndërsa rreth 3350 janë shëruar dhe janë liruar nga spitalet.
Të hënën, një zëdhënës i qeverisë konfirmoi se rreth 12 për qind e personave të infektuar janë punëtorë të sektorit të shëndetësisë.
Gjatë fundjavës, në Madrid u panë skena të tmerrshme. Spitalet janë mbushur me pacientë dhe disa prej tyre u panë të shtrirë nëpër korridore, shkruan “Anadolu”, transmeton Gazeta Express.
Autoritetet po i shndërrojnë në spitale objektet e tjera, përfshirë një qendër të konferencave në Madrid. Të tilla spitale pritet të përgatiten edhe në pjesët e tjera të vendit.
Kryeministri spanjoll njoftoi të dielën se karantina mbarëkombëtare do të vazhdojë të mbetet në fuqi të paktën deri më 12 prill.
Spanja është vendi më i goditur nga koronavirusi në Evropë pas Italisë.
