I gjithë globi po ballafaqohet me pandeminë Koronavirus, e së fundi është shfaqur edhe në Kosovë, raporton Front Online.
Bejtush Jashari, kryeshef në Qendrën Klinike të Mjekësisë Familjare në Podujevë, në një prononcim për Front Online, tha se për momentin nuk ka mungesë në barnave dhe pajisjeve mbrojtëse në këtë qendër.
Ai tha se fshati ku është i infektuari në këtë komunë tashmë është në karantinë dhe se janë marrë të gjitha masat.
“Fshati Dumnicë është në karantinë dhe janë marrë të gjitha masat për të dezinfektuar shtëpitë në atë lagje”, tha Jashari.
Më tej, ai tha se janë në kontakt edhe me Ministrinë e Shëndetësisë dhe Instituti Kombëtar të Shëndetësisë Publike.
“Po jemi në kontakt me Instituti Kombëtar të Shëndetësisë Publike dhe Ministrinë e Shëndetësisë, për momentin jemi të furnizuar mirë dhe na kanë dalë në ndihmë, do t’i marrim të gjitha masat e nevojshme si komunë”, tha Jashari për Front Online.
Në Kosovë janë identifikuar edhe katër raste të reja me Koronavirus duke e çuar në 13 numrin e personave të infektuar.
Qeveria e Kosovës, pas rritjes së numrit të të infektuarve, më 15 mars vendosi që të shpallë gjendje të emergjencës publike.
