Janë paraqitur edhe katër raste të reja me koronavirus në Kosovë, duke çuar në 9 numrin e përgjithshëm.
Këtë e ka konfirmuar ministri i Shëndetësisë, Arben Vitia.
Ky i fundit ka treguar se tre raste të reja janë paraqitur në Malishevë, ndërsa risia është se edhe Podujeva futet në listën e të prekurve.
Nëse veprohet si në Viti, Malishevë e Klinë edhe Podujeva pritet të futet në karantinë.
Postimi i tij:
Para pak minutash bazuar në rezultatet e testimeve u konfirmuan edhe katër raste reja pozitive me virusin SARS-CoV-2 (coronavirus).
Tri raste nga Komuna e Malishevës, që të tre persona kontakti të një pacienteje të diagnostikuar pozitive me COVID-19, me datë 14.03.2020 dhe rasti i katërt është personi nga Komuna e Podujevës. Përfshirë edhe rastet e mëhershme, tani më në Kosovë kemi të konfirmuara 9 raste pozitive me COVID-19.
Bazuar në situatën e krijuar dhe me qëllim të ruajtjes së shëndetit të popullatës, porsa kërkova nga Kryeministri, Albin Kurti, që t’i propozojë Qeverisë shpalljen e emergjencës për shëndetin publik. Të dashur qytetarë ju ftojmë të bashkëpunojmë në menaxhimin e kësaj situate. Kjo duke ndjekur rekomandimet nga Ministria e Shëndetësisë dhe Instituti Kombëtar i Shëndetit Publik, si dhe duke qëndruar në shtëpitë tuaja, që të kujdesemi për shëndetit njëri-tjetrit. Reduktoni daljet veç në raste emergjente./Reporteri.net/.
