Infektologu në Klinikën Infektive në QKUK, Valbon Krasniqi, në një intervistë për portalin Front Online, ka folur për situatën në Kosovë sa i përket përgatitjeve për t’u përballur me Koronavirusin.
Krasniqi tha se gjatë ditës së sotme në Klinikën Infektive, kanë kërkuar trajtim gjatë persona të cilët dyshohen për Koronavirus.
Ai tha se analizat e tyre do të dalin dikur në mbrëmje.
“Në javën e fundit, ne kemi pothuajse numër të konsideruar të personave të cilët vinë këtu për tu testuar për faktin se kanë histori të udhëtimit në vendet ku është përhapur Koronavirusi. Gjatë ditës së sotme kanë ardhur edhe 6 persona të cilët janë ndaluar dhe u janë marrë mostrat për tu testuar”, tha ai për Front Online.
Krasniqi ka demantuar lajmet e disa medieve se disa pacientëve u janë dërguar mostrat e tyre në Shqipëri për analiza.
Ai për Front Online tha se nuk ka arsyeje të ndodhë një gjë e tillë pasi që Instituti i ka të gjitha pajisjet mjekësore.
“Unë nuk e di që mostrat po dërgohen në Shqipëri, nuk ka nevojë të dërgohen pasi që Instituti është i pajisur me teste dhe pajisje mjekësore të cilat i përdorin edhe shtetet tjera. Kështu që nuk shoh arsye se duhet t’i dërgojmë analizat jashtë”, tha ai.
Sipas infektologut Krasniqi, Klinika Infektive ka 130 shtretër ndërsa për rastet të cilat dyshohen për Koronavirus, janë ndarë dhjetë dhoma me nga 20 shtretër.
“Ne kemi kushte optimale për t’i trajtuar. Fillimisht kemi marrë masat për mbrojtje të personelit, i kemi pajisur me maska, syze, uniformin dhe pajisje tjera të nevojshme, materiale dezinfektuese dhe poashtu kemi caktuar repartin për këta pacientë, pra repartin e izolimit ku do të trajtohen. Ne kemi vënë në përdorim diku dhjet dhoma me 20 shtretër, ndërkohë që tërë kapaciteti i Klinikës është 130 shtretër dhe në rast nevoje do të shfrytëzohet e gjithë klinika”, tha ai për Front Online.
Infektologu tha se virusi nuk mund të përsëritet te një person për herë të dytë brena një kohe të shkurtër.
“Tani në Kosovë nuk kemi asnjë rast të konfirmuar me Koronavirus e as që e ka kaluar. Nga shkenca mjekësore është se një person i sëmurë me një virus është vështirë të sëmurët për herë të dytë brenda një kohë të shkurtër, megjithatë kjo nuk është një siguri e plotë që një person që veç e kalon një herë infeksioni të mos sëmurët pas disa muajve përsëri”, tha Krasniqi.
Ai tha se rreziku për përhapjen e Koronavirusit në Kosovë është optimal pas përhapjes së tij në të gjitha shtete.
“Rreziku është real, është objektiv meqenëse të gjitha shtete janë të prekura nga ky virus. Arsyeja pse nuk ka ardhur ende është e vështirë të thuhet mbase kemi pasur qarkullim më të vogël me shtetet ku është përhapur virusi, jemi dëshmitarë se vetëm në kohën e fundit është përhapur në Itali”, tha ai për Front Online.
