Presidenti i Republikës së Kosovës, Hashim Thaçi, do t’iu drejtohet qytetarëve përmes një konference për media që do ta mbajë sot në orën 16:00.
Ky vendim për të mbajtur konferencë ka ardhur pas refuzimit të Kuvendit të Kosovës që të organizojë një seancë për sot siç ishte kërkuar nga presidenti, për të raportuar rreth takimeve në Washington.
Njoftimi i plotë i presidencës:
Presidenti Thaçi mban konferencë për media në orën 16:00
Presidenti i Republikës së Kosovës, Hashim Thaçi, pas kthimit nga Shtetet e Bashkuara të Amerikës, sot (4 mars 2020), në orën 16:00, do të mbajë konferencë për media.
Ndryshe, para pak minutash kryetarja e Kuvendit të Kosovës, Vjosa Osmani i është përgjigjur kërkesës së presidentit për të raportuar para legjislativit për vizitën në SHBA.
Osmani në letrën e saj ndër të tjera i ka thënë presidentit Thaçi, se në raste të tilla, duhet kërkesa të vijë disa ditë më herët.Sipas saj, nuk do të mund të raportoj ai para datës 9 mars, raporton Gazeta Blic.
“Kërkesa juaj për adresim Kuvendit, do të trajtohet që në mbledhjen e parë të Kryesisë, e cila do të mbahet menjëherë pas 9 marsit. Meqnëse adresimi që keni kërkuar ta bëni para deputetëve nuk është trajtuar si çështje urgjente në letrën tuaj, do t’ju njoftojmë shumë shpejt për datën, në të cilën ju mund t’i adresoheni Kuvendit, në përputhje me nenin 84 (30) të Kushtetutës”, thuhet ndër të tjera në letrën që Osmani ia ka kthyer presidentit.
