Qeveria e Albin Kurtit pritet të veprojë ndaj emërimeve të Ramush Haradinajt, sa ishte në postin e kryeministrit në largim.
Indeksonline mëson se shefi i ri i Ekzekutivit do të marrë masa ndëshkuese ndaj vendimit të ish-kryeministrit, i cili për gjashtë muaj e gjysmë mbajti shtatë mbledhje dhe mori një sërë vendimesh dhe emërimesh.
Dosje të shumta që do të futen “nën llupën” e Kurtit janë në institucione të sigurisë dhe pozicione diplomatike.
Emërimi në Agjencinë Kosovare të Inteligjencës është vendimi i ish-kryeministri Haradinaj së bashku me presidentin, Hashim Thaçi.
Dy krerët e institucioneve, më 25 nëntor të vitit të kaluar kishin emëruar drejtuesit e AKI-së, shefin dhe kryeinspektorin.
Përpos Inteligjencës, Kurti pritet t’i rishikojë edhe disa emërime të ambasadorëve dhe shkarkimin e disa të tjerëve.
Vlen të theksohet se Haradinaj dorëheqjen nga posti i kryeministrit e kishte bërë më 19 korrik të 2019-s.
Në një konferencë shtypi, pas një mbledhjeje të Qeverisë, ai kishte deklaruar se arsyeja e dorëheqjes ishte ftesa nga Gjykata Speciale, në cilësinë e të dyshuarit.
Mirëpo, ndonëse dha dorëheqjen, ai vazhdoi punën në Ekzekutiv edhe për fiks 200 ditë, pasi Albin Kurti (3 shkurt) edhe “de jure” mori postin e kryeministrit. /Indeksonline/
